នៅក្នុងបរិបទនៃការគំរាមកំហែងតាមអ៊ីនធឺណិតដែលកំពុងកើនឡើង និងកាន់តែស្មុគស្មាញ ការការពារវិស័យហិរញ្ញវត្ថុបានក្លាយជាអាទិភាពចម្បងសម្រាប់កម្ពុជា។ ដើម្បីឆ្លើយតបនឹងបញ្ហានេះ សមាគមធនាគារនៅកម្ពុជា (ABC) បានប្រារព្ធ “ទិវាសុវត្ថិភាពឌីជីថល ឆ្នាំ២០២៥” កាលពីថ្ងៃទី ២៣ ខែឧសភា ឆ្នាំ២០២៥ ក្រោមប្រធានបទ “ការទប់ស្កាត់ និងការការពារ”។ ព្រឹត្តិការណ៍នេះមានគោលបំណងបង្កើនការយល់ដឹង ពង្រឹងកិច្ចសហការ និងលើកកម្ពស់ឧត្តមានុវត្តន៍សម្រាប់សុវត្ថិភាពឌីជីថល។
សុវត្ថិភាពឌីជីថល៖ ភារកិច្ចរួមរបស់គ្រប់គ្នា
លោក រ័ត្ន សោភ័ណ ប្រធានសមាគមធនាគារនៅកម្ពុជា បានសង្កត់ធ្ងន់ថា សុវត្ថិភាពឌីជីថលលែងមែនជាមុខងារបច្ចេកទេសតែមួយផ្នែក ឬជាការទទួលខុសត្រូវរបស់ផ្នែកព័ត៌មានវិទ្យា (IT) ទៀតហើយ។ លោកបានថ្លែងថា៖ “វាជាអាទិភាពសម្រាប់គណៈគ្រប់គ្រងស្ថាប័ន ឬក្រុមប្រឹក្សាភិបាលរបស់គ្រឹះស្ថានហិរញ្ញវត្ថុទាំងមូល… គ្រប់គ្នានៅក្នុងវិស័យហិរញ្ញវត្ថុជាអ្នកមានតួនាទីក្នុងការទប់ស្កាត់ និងការពារចំពោះបញ្ហានេះ”។
លោក សោភ័ណ បានបន្ថែមថា រាល់ការចុចលើប្រតិបត្តិការ និងការផ្ទេរទិន្នន័យ គឺមានសារៈសំខាន់ណាស់ក្នុងការត្រួតពិនិត្យឱ្យបានម៉ត់ចត់ ព្រោះការគំរាមកំហែងតាមប្រព័ន្ធឌីជីថលមានពិតប្រាកដ និងវិវត្តជាប្រចាំ។ លោកបានលើកឡើងពីទម្រង់បោកប្រាស់នានាដូចជា៖
- ការបោកប្រាស់តាមរយៈសារ ឬអ៊ីមែល (Phishing)
- ការវាយប្រហារដោយមេរោគកុំព្យូទ័រ (Ransomware)
- ការប្រើប្រាស់ឧបករណ៍ក្លែងក្លាយ (Fake BTS) ដើម្បីផ្សព្វផ្សាយសារដែលមានមេរោគតាមរយៈតំណភ្ជាប់ (link)។
បញ្ហាទាំងនេះតម្រូវឱ្យមានការយល់ដឹងខ្ពស់ និងវិធានការការពារប្រកបដោយសុវត្ថិភាព។
តួនាទីរបស់ធនាគារជាតិ និងកិច្ចសហការ
លោក ឡុង វីបុណ្យឫទ្ធ អគ្គនាយករងប្រតិបត្តិការ ធនាគារជាតិនៃកម្ពុជា (NBC) បានបញ្ជាក់ថា ការងារស្នូលរបស់ធនាគារជាតិគឺការថែរក្សាគុណតម្លៃ និងស្ថិរភាពវិស័យធនាគារ និងហិរញ្ញវត្ថុ ដែលប្រកបដោយបរិយាបន្ន ពិពិធកម្ម និងសុវត្ថិភាព។ លោកបានទទួលស្គាល់ពីតួនាទីសំខាន់នៃសុវត្ថិភាពឌីជីថលក្នុងការថែរក្សាទំនុកចិត្តលើសេវាហិរញ្ញវត្ថុឌីជីថល។
លោកបានអំពាវនាវដល់ភាគីពាក់ព័ន្ធទាំងអស់ រួមមាន៖ និយ័តករ គ្រឹះស្ថានហិរញ្ញវត្ថុ អ្នកផ្តល់សេវាបច្ចេកវិទ្យា និងអតិថិជន ឱ្យចូលរួមជំរុញការយល់ដឹងអំពីសុវត្ថិភាពឌីជីថល ជំរុញនវានុវត្តន៍ និងសហការរួមគ្នាដើម្បីទប់ស្កាត់ និងការពារសុវត្ថិភាពឌីជីថលនៅកម្ពុជា។
កិច្ចពិភាក្សាសំខាន់ៗ និងការចូលរួមពីដៃគូ
ទិវាសុវត្ថិភាពឌីជីថលនេះ បានរៀបចំកិច្ចពិភាក្សាសំខាន់ៗចំនួន ៣ ដែលផ្តោតលើការអភិវឌ្ឍគោលនយោបាយសុវត្ថិភាពឌីជីថល ការទប់ស្កាត់ការបោកប្រាស់ និងការធានាសុវត្ថិភាពលើប្រព័ន្ធឌីជីថលក្នុងវិស័យធនាគារ និងហិរញ្ញវត្ថុ។
ស្ថាប័នសំខាន់ៗដូចជា ធនាគារជាតិនៃកម្ពុជា (NBC), នាយកដ្ឋានប្រឆាំងបទល្មើសបច្ចេកវិទ្យានៃក្រសួងមហាផ្ទៃ, ក្រុមហ៊ុន Mastercard និងអង្គភាពស៊ើបការណ៍ហិរញ្ញវត្ថុកម្ពុជា (CAFIU) បានចូលរួមចែករំលែកការយល់ដឹង និងយុទ្ធសាស្ត្រក្នុងការប្រយុទ្ធប្រឆាំងនឹងការគំរាមកំហែងដែលកំពុងកើនឡើង។
លោកស្រី Wong Winnie នាយកប្រចាំប្រទេសរបស់ក្រុមហ៊ុន Mastercard ប្រចាំប្រទេសវៀតណាម ឡាវ និងកម្ពុជា បានបញ្ជាក់ថា Mastercard ធ្វើការយ៉ាងជិតស្និទ្ធជាមួយដៃគូរដ្ឋ និងវិស័យធនាគារ ដើម្បីចែករំលែកព័ត៌មានអំពីហានិភ័យ ដំណោះស្រាយសុវត្ថិភាពតាមប្រព័ន្ធអ៊ីនធឺណិត និងអភិវឌ្ឍគោលនយោបាយគាំទ្រ។ លោកស្រីបានបន្តថា សុវត្ថិភាពឌីជីថលបានក្លាយជាយុទ្ធសាស្ត្រអាទិភាពដែលទាមទារឱ្យមានកិច្ចសហការយ៉ាងជិតស្និទ្ធរវាងវិស័យរដ្ឋ និងឯកជន ដើម្បីឆ្លើយតបនឹងហានិភ័យដែលកំពុងកើនឡើង។
ទិវាសុវត្ថិភាពឌីជីថល ឆ្នាំ២០២៥ មិនត្រឹមតែជំរុញឱ្យមានការសន្ទនារវាងភាគីពាក់ព័ន្ធប៉ុណ្ណោះទេ ប៉ុន្តែក៏មានគោលបំណងបង្កើនចំណេះដឹងផ្នែកឌីជីថលសម្រាប់អ្នកជំនាញក្នុងវិស័យធនាគារ និងហិរញ្ញវត្ថុ និងលើកកម្ពស់វប្បធម៌នៃការការពារតាមប្រព័ន្ធអ៊ីនធឺណិតប្រកបដោយបុរេសកម្ម៕
