ធនាគារ វីង (ខេមបូឌា) ម.ក និងធនាគារ ស៊ីអាយអិមប៊ី សិង្ហបុរី បានចុះហត្ថលេខាលើអនុស្សរណៈនៃការយោគយល់គ្នាកាលពីថ្ងៃទី០២ ខែមិថុនា ឆ្នាំ២០២៥។ កិច្ចព្រមព្រៀងនេះមានគោលបំណងលើកកម្ពស់សេវាហិរញ្ញវត្ថុអន្តរជាតិ និងជំរុញកិច្ចសហប្រតិបត្តិការសេដ្ឋកិច្ចរវាងកម្ពុជា និងសិង្ហបុរី។
ភាពជាដៃគូនេះត្រូវបានគេមើលឃើញថាជាការបោះជំហានដ៏សំខាន់មួយ ក្នុងការកសាងទំនាក់ទំនងប្រព័ន្ធហិរញ្ញវត្ថុនៅក្នុងតំបន់អាស៊ាន។ តាមរយៈការរួមបញ្ចូលគ្នារវាងភាពខ្លាំងក្នុងតំបន់របស់ធនាគារ ស៊ីអាយអិមប៊ី និងភាពឈានមុខគេនៅក្នុងប្រទេសរបស់ធនាគារ វីង ធនាគារទាំងពីរនឹងផ្តល់ជូននូវសេវាហិរញ្ញវត្ថុចម្រុះ ដែលឆ្លើយតបទៅនឹងតម្រូវការរបស់អតិថិជនគ្រប់ប្រភេទ រួមមានក្រុមហ៊ុនពាណិជ្ជកម្ម សហគ្រាសធុនតូច និងមធ្យម (SMEs) និងអតិថិជនដែលមានចំណូលខ្ពស់។
បណ្ឌិត Dmytro Kolechko អគ្គនាយកធនាគារ វីង បានមានប្រសាសន៍ថា៖
«ការចាប់ដៃគូជាមួយធនាគារ ស៊ីអាយអិមប៊ី សិង្ហបុរី នឹងអនុញ្ញាតឱ្យយើងខ្ញុំនាំមកនូវដំណោះស្រាយហិរញ្ញវត្ថុកម្រិតពិភពលោក ដើម្បីបំពេញតម្រូវការអតិថិជន ព្រមទាំងរួមចំណែកពង្រឹងកិច្ចសហប្រតិបត្តិការសេដ្ឋកិច្ចរវាងកម្ពុជា និងសិង្ហបុរី។ នេះគឺជាជំហានដ៏សំខាន់មួយ សំដៅលើកកម្ពស់បរិយាបន្នហិរញ្ញវត្ថុ និងឱកាសពាណិជ្ជកម្មអន្តរជាតិ»។
ភាពជាដៃគូនេះមានគោលបំណងប្រើប្រាស់បណ្តាញឯកទេសហិរញ្ញវត្ថុរបស់ធនាគារ ស៊ីអាយអិមប៊ី នៅប្រទេសសិង្ហបុរី រួមជាមួយនឹងវត្តមានដ៏រឹងមាំរបស់ធនាគារ វីង នៅក្នុងប្រទេសកម្ពុជា ដើម្បីផ្តល់ដំណោះស្រាយហិរញ្ញវត្ថុងាយស្រួលប្រើប្រាស់សម្រាប់អតិថិជន សហគ្រាសធុនតូច និងមធ្យម និងអតិថិជនដែលមានចំណូលខ្ពស់។
កិច្ចសហប្រតិបត្តិការនេះនឹងផ្តល់ជូនដំណោះស្រាយធនាគារជាច្រើនដូចជា៖ ប្រាក់បញ្ញើ កម្ចី ការផ្ទេរប្រាក់ និងហិរញ្ញប្បទានពាណិជ្ជកម្មជាដើម ដើម្បីគាំទ្រកំណើនតម្រូវការអាជីវកម្មអន្តរជាតិ។ ការផ្តោតសំខាន់គឺគាំទ្រដល់សហគ្រាសធុនតូច និងមធ្យម (SMEs) របស់កម្ពុជា ដែលជាឆ្អឹងខ្នងនៃសេដ្ឋកិច្ចកម្ពុជា ដោយមានចំណែក ៩៨% នៃអាជីវកម្មកំពុងដំណើរការ ៧០% នៃការផ្តល់ឱកាសការងារ និងប្រមាណ ៥៨% នៃផលិតផលក្នុងស្រុកសរុបរបស់កម្ពុជា។
លោក Victor Lee Meng Teck ប្រធាននាយកប្រតិបត្តិ CIMB Singapore និងប្រធាននាយកប្រតិបត្តិ Growth Markets បានបញ្ជាក់បន្ថែមថា៖
«កិច្ចសហប្រតិបត្តិការរបស់យើងជាមួយធនាគារ វីង បានឆ្លុះបញ្ចាំងពីការប្តេជ្ញាចិត្តរបស់ធនាគារ ស៊ីអាយអិមប៊ី សិង្ហបុរី ក្នុងការលើកកម្ពស់បរិយាបន្នហិរញ្ញវត្ថុ និងការអភិវឌ្ឍសេដ្ឋកិច្ចក្នុងតំបន់អាស៊ាន។ តាមរយៈកិច្ចសហការរួមគ្នានេះ យើងនឹងនាំមកនូវគុណតម្លៃថ្មីសម្រាប់អតិថិជន ព្រមទាំងពង្រឹងមធ្យោបាយហិរញ្ញវត្ថុរវាងប្រទេសសិង្ហបុរី និងកម្ពុជា»។
យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា ក្នុងឆ្នាំ២០២៤ ទំហំពាណិជ្ជកម្មរវាងប្រទេសទាំងពីរបានកើនឡើងដល់ ១០៣ លានដុល្លារអាមេរិក ដែលជាការកើនឡើងគួរឱ្យកត់សម្គាល់ដល់ទៅ ១០១% បើធៀបនឹងឆ្នាំ២០២៣។ ភាពជាដៃគូរវាងធនាគារ វីង និងធនាគារ ស៊ីអាយអិមប៊ី សិង្ហបុរី នឹងជួយសម្រួលសេវាហិរញ្ញវត្ថុ ធ្វើឱ្យប្រតិបត្តិការអន្តរប្រទេសដំណើរការកាន់តែរលូន និងជួយឱ្យអាជីវកម្មរីកចម្រើន។
កិច្ចសហការនេះនឹងប្រើប្រាស់ជំនាញឯកទេសរបស់ធនាគារ ស៊ីអាយអិមប៊ី នៅប្រទេសសិង្ហបុរី ដែលជាមជ្ឈមណ្ឌលគ្រប់គ្រងទ្រព្យសម្បត្តិនាំមុខគេមួយក្នុងតំបន់អាស៊ាន រួមជាមួយជំនាញក្នុងស្រុករបស់ធនាគារ វីង ដើម្បីផ្តល់ជូនអតិថិជនដែលមានចំណូលខ្ពស់នូវជម្រើសវិនិយោគបត់បែន និងដំណោះស្រាយគ្រប់គ្រងទ្រព្យសម្បត្តិប្រកបដោយសុវត្ថិភាព ដែលសមស្របទៅនឹងភាពរីកចម្រើននៃទីផ្សារហិរញ្ញវត្ថុនៅក្នុងប្រទេសកម្ពុជា។
ភាពជាដៃគូដ៏សំខាន់នេះ គឺជាការត្រួសត្រាយផ្លូវសម្រាប់យុគសម័យថ្មីនៃការធ្វើសមាហរណកម្មហិរញ្ញវត្ថុរវាងប្រទេសសិង្ហបុរី និងកម្ពុជា សំដៅជំរុញកំណើន ការច្នៃប្រឌិត បរិយាបន្នហិរញ្ញវត្ថុ និងកំណើនប្រកបដោយចីរភាព។ តាមរយៈការជំរុញការតភ្ជាប់សេដ្ឋកិច្ចប្រទេសទាំងពីរ កិច្ចសហការរវាងធនាគារ វីង និងធនាគារ ស៊ីអាយអិមប៊ី សិង្ហបុរី នឹងនាំមកនូវវិបុលភាព និងសមាហរណកម្មកាន់តែរឹងមាំសម្រាប់អនាគតដ៏ត្រចះត្រចង់ក្នុងតំបន់អាស៊ាន៕
